LOGORECI Lajme

Hillari Klinton fitoi zgjedhjet paraprake në shtetin e Pensilvanisë

2008-04-23T19:27:44Z

VOA - Hillari Klinton fitoi zgjedhjet paraprake në shtetin e Pensilvanisë

nga Paula Wolfson

Kandidatja demokrate për president, Hillari Klinton, fitoi zgjedhjet paraprake në shtetin amerikan të Pensilvanisë, duke mbajtur kështu gjallë fushatën e saj. Ajo tha mbrëmë para një grumbulli përkrahësish të saj pas zgjedhjeve se amerikanët nuk epen prandaj edhe meritojnë një president që nuk epet.

Pas zgjedhjeve të djeshme, senatorja Klinton foli para përkrahësve të saj në Filadelfia, duke i falenderuar ata për mbështetjen e tyre. Ajo u zotua gjithashtu se do të vazhdojë fushatën megjithë thirrjet për tërheqjen e saj nga gara.

"Unë mund të pengohem, madje edhe të rrëzohem, por për sa kohë që kam mbështetjen tuaj, unë gjithnjë do të ngrihem. Sepse për mua, në fund të fundit, çështja nuk është nëse ne mund të mbajmë premtimin e Amerikës, por nëse me do ta mbajmë premtimin e Amerikës".

Senatorja e Nju Jorkut tha se falë mbështetjes së Pensilvanisë për të, gjërat po ndryshojnë. Megjithë fitoren e djeshme në Pensilvaninë e pasur me delegatë, zonja Klinton vazhdon të jetë mbrapa rivalit të saj, senatorit Barak Obama për sa i përket numrit të delegatëve, të cilët do të emërojnë kandidatin e partisë. Pensilvania ka 158 delegatë, të cilët do të ndahen mes dy kandidatëve demokratë në bazë të numrit të votave të fituara.

Duke folur në shtetin tjetër amerikane Indiana, ku zgjedhjet paraprake zhvillohen më 6 maj, senatori Obama uroi zonjën Klinton për fitoren dhe u tha të pranishmëve se ajo zhvilloi një garë të shkëlqyer në Pensilvani.

Në këtë shtet, shumica e njerzve janë të një mendimi se nuk kanë parë kurrë më parë një gjë të tillë.

Tradicionalisht, Pensilvania i mban zgjedhjet paraprake vonë dhe për vite me radhë kandidati i secilës parti dihet deri në atë kohë.

Por zyrtarët e zgjedhjeve thanë se ky vit ndryshon. Dy kandidatët demokratë vazhdojnë betejën për të siguruar emërimin e partisë, numri i votuesve të rregjistruar është shumë i lartë dhe pjesëmarrja pritej të ishte e lartë.

Në një qendër votimi në periferi të qytetit të Pitsburgut, një zyrtar i zgjedhjeve i quajtur All përshkruan atmosferën.

"Nuk kam parë një antuziazëm të tillë që kur fillova të votoj për Xhek Kenedin".

Pjesëmarrja në zgjedhje ishte e njëjtë në të gjithë shtetin, me një rritje në orët e fundit para mbylljes së qendrave të votimit.

Situata ishte mjaft serioze dhe votuesit e dinin fare mirë se këtë vit vota e tyre ka shumë rëndësi.

Elizabeta, mësuese në një shkollë të mesme, thotë se votoi për Barak Obamën.

"Shumë njerëz flasin rreth elokuencës së tij, madje shumë të tjerë thonë se kur flet senatori Obama nuk ka substancë. Por kurdo herë që e kam dëgjuar të flasë, unë dëgjoj se ai flet rreth çështjeve me substancë dhe i diskuton ato në një mënyrë inteligjente dhe të thjeshtë".

Edhe republikanët po zhvillojnë zgjedhje paraprake në Pensilvani. Republikanët e kanë kandidatin për në zgjedhjet e përgjithshme të nëntorit, senatorin Xhon Mekein. Por Gregu, anëtar i partisë republikane, tha se në fletën e tij të votimit shkruajti emrin e Barak Obamës, megjithëse kjo votë e tij nuk quhet.

"Desha që zëri im të dëgjohej. Unë desha të përfaqësoja sot senatorin Obama. Dhe kjo ishte arsyeja që erdha këtu".

Votues të rinj si Elizabeta dhe Gregu, përbëjnë bazën e mbështetjes për Barak Obamën në Pensilvani. Ata mbështesin mesazhin e tij për ndryshime. Por votues më të moshuar duket se ishin të interesuar në përvojën e kandidatit. Dhe të gjitha shenjat tregojnë se ata mbështesin senatoren Hillari Klinton.

Pasi votoi, një grua e moshuar e quajtur Xhoen shpjegoi arsye pse votoi për senatoren e Nju Jorkut.

"Ajo i bën të qarta pikpamjet e saj, të cilat mua më pëlqejnë".

Ajo tha se e hodhi votën e saj duke u bazuar jo vetëm në çështjet që prekin të moshuarit, por edhe fëmijët dhe brezat e ardhshëm.

Votuesit në Pensilvani e dinë se rezultati në shtetin e tyre është historik dhe për herë të parë një parti e madhe politike do të emërojë kandidat për president ose një grua ose një afrikano-amerikan.

Ati i Shenjtë në udhëtim drejt Shteteve të Bashkuara

2008-04-15T21:56:38Z

VOA - Ati i Shenjtë në udhëtim drejt Shteteve të Bashkuara

Papa Benedikti, i cili është nisur për në Uashington, tha se ndjen "një turp të madh" nga skandalet seksuale të klerikëve katolikë. Papa i bëri komentet për gazetarët që udhëtojnë me të në avionin e Alitalias. Kjo do të jetë vizita e tij e parë në Shtetet e Bashkuara si At i Shenjtë. Ai shtoi se kisha do të bëjë ç'është e mundur për të mos lejuar një përsëritje të skandaleve. Kisha Katolile, tha Papa, do t'i nxjerrë jashtë radhëve të saj pedofilët. Presidenti Bush dhe bashkëshortja e tij, Laura Bush do ta presin Papën kur të zbresë në Bazën Ajrore Andrews pranë Uashingtonit. Një ceremoni zyrtare mirëseardhjeje është planifikuar për nesër në Shtëpinë e Bardhë.

Është vetëm e dyta herë që një papë vjen në Washington dhe nëpër rrugë janë vendosur flamurë të Vatikanit me këtë rast. Ati i Shenjtë do të mbërrijë në Shtetet e Bashkuara për një vizitë të shpejtë në Washington dhe New York.

Presidenti Bush është përgatitur ta presë me të gjitha nderimet Benediktin. Ai do të shkojë ta presë Papën në bazën ushtarake pranë Washingtonit, ka ftuar një numër të madh njerëzish për një audiencë me të, si edhe një darkë madhështore në Shtëpinë e Bardhë. Është hera e parë që Presidenti Bush bën përgatitje të tilla një tregues i simpatisë së madhe që ai ka për Papa Benediktin. "Është një moment i rëndësishëm historik, pavarësisht nëse je ose jo katolik. Ne kemi bërë përgatitje të kujdesshme deri në detaje, jo shumë ndryshe nga rastet e tjera, por mendoj se të gjithë jemi kaq të entuziazmuar dhe duam që Papa t'ia kalojë mirë në Amerikë", thotë Nancy Brinker, Shefja e Protokollit e Shteteve të Bashkuara.

Por entuziazmi i kalon muret e Shtëpisë së Bardhë. Në Bazilikatën Katolike të Uashingtonit, turistë nga i gjithë vendi po shkojnë për të përjetuar ndjesinë e festimeve të kësaj jave. Tommy dhe Donna Wothy udhëtuan të dielën gjithë natën që të arrinin të hënën në Washington. Ata kanë marrë bileta për të dëgjuar meshën të enjten dhe mendojnë se është një shans që vjen një herë në jetë, "Është diçka që nuk do ta harrojmë kurrë dhe do t'ja tregojmë fëmijëve dhe nipërve e mbesave".

Ata nuk janë të vetmit. Objektet për nder të Papës Benedikt janë dhuratat më të shitura këtë javë në Uashington. Në Universitetin Katolik fare pranë Bazilikatës, entuziazmi është i ndjeshëm. Motër Eloina Alvarez po merrte biletat për vizitën e Papës në Universitet. "Është njëlloj si të shohësh Jezu Krishtin, sepse ai është kreu i kishës sonë".

Të enjten Benedikti do të marrë pjesë në grumbullimin e vetëm publik në kryeqytetin e vendit, një meshë paradite në Stadiumin e ri të Bejsbollit. Kapaciteti i stadiumit është 46 mijë vende, shumë më pak sesa lista e atyre që donin të merrnin bileta për të marrë pjesë sa u njoftua për vizitën.

Por ndërsa shumë vetë janë duke pritur me padurim për Vizitën e Papës, disa demonstrues u mblodhën dje para Shtëpisë së Bardhë për të protestuar kundër abuzimeve seksuale për të cilat janë akuzuar priftërinjë katolikë.

Romela Begaj Nenkampione Evrope

2008-04-15T21:26:26Z

Logoreci - Romela Begaj Nenkampione Evrope

Berluskoni merr mandatin e tretë

2008-04-15T21:18:42Z

BBC - Berluskoni merr mandatin e trete

Figura politike me e njohur e Italisë, udhëheqësi i qendrës së djathtë Silvio Berluskoni ka paralajmëruar se vendi ka muaj të vështirë përpara ndërsa ai merr postin e kryeministrit pas zgjedhjeve të përgjithshme.

Ai fitoi një mandat të tretë në detyrë së bashku me aleancën e tij politike duke marrë nën kontroll të dyja dhomat e parlamentit, Dhomën e Ulët dhe Senatin.

Kundërshtari i tij i qendrës së majtë pranoi humbjen vetëm pak orë pasi filluan të dalin rezultatet.

Manjati 71-vjeçar milarder i mediave, Berluskoni, ka premtuar veprim urgjent për përmirësimin e ekonomisë në përkeqësim të vendit.

Ai tha se ishte i prekur nga besimi që shumë qytetarë i kishin dhënë atij.

Përparësitë e tij të menjëhershme do të jenë shitja e kompanisë ajrore me humbje Alitalia dhe zgjidhja e krizës së plehrave të pambledhura në Napoli.

Politikë e re

Duket se politika italiane ka marrë një formë të re, janë larguar një numër partish të vogla të së majtës dhe të djathtës që i kishin kthyer qeveritë në kompromise të brishta.

Ka mundësi që në dhomën e re të deputetëve të fitojnë mundësinë e përfaqësimit deri në gjashtë parti nga rreth 20 që ishin në parlamentin e shkuar.

Megjithatë Berluskonit do t'i duhet të bëjë marrëveshje të vështira me partnerët e tij.

Liga e Veriut, që dëshiron autonomi të gjerë për rajonet e Italisë, gati i dyfishoi votat në favor të saj.

Dhe pa mbështetjen e Ligës zoti Berluskoni do të humbiste shumicën e tij.

OKB thirret në Grupin e Kontaktit për të kundërshtuar ndarjen e Kosovës

2008-03-26T11:58:14Z

KosovaLive - OKB thirret në Grupin e Kontaktit për të kundërshtuar ndarjen e Kosovës

Qëndrimi i OKB-së është shumë i qartë, i ngjashëm edhe me qëndrimin e Grupit të Kontaktit, se nuk do të ketë ndarje të Kosovës, tha të mërkurën në Prishtinë, zëdhënësi i Misionit të Kombeve të Bashkuara në Kosovë, Alexander Ivanko.

Sindi MekKein viziton Kosovën

2008-03-26T10:24:54Z

Kosovapress - Sindi MekKein viziton Kosovën

Sindi MekKein, bashkëshortja e kandidatit republikan për president në Shtetet e Bashkuara, Xhon MekKein, viziton të mërkurën Kosovën, për t'u takuar me udhëheqësit më të lartë të institucioneve vendore.

Ora më e saktë e botës - gabon një sekondë në 200 milion vjet

2008-03-26T10:18:34Z

VOA - Ora më e saktë e botës - gabon një sekondë në 200 milion vjet

nga Shelley Schlender, Boulder, Kolorado

Shkencëtarët në Universitetin e Kolorados në qytetin Boulder, në bashkëpunim me Institutin Kombëtar të Standarteve dhe Teknologjisë, kanë krijuar një orë e cila gabon vetëm një sekondë në 200 milion vjet. Kjo është dy herë më e saktë se ora matëse zyrtare e përdorur në Shtetet e Bashkuara, e cila kontribuon në saktësinë e orës zyrtare botërore.

Në një dyqan të mbushur me orë të vjetra, asnjëra prej tyre nuk rreh njëlloj. Kjo sepse minutë pas minute, javë pas jave, shumica e pajisjeve që masin kohën e humbin saktësinë.

Por me ritmin të shpejtë që lëviz bota sot, për shumë procese duhet më shumë saktësi. Në një laborator në Universitetin e Kolorados, profesori i fizikës, Xhun Ji thotë se ora eksperimentale e ekipit të tij mund të bëhet një nga orët më të mira. Kjo për arsye se ajo rreh miliona herë më shpejt se një orë e vjetër.

Është më e saktë edhe se ora standarte zyrtare e Shteteve të Bashkuara, një orë e sofistikuar atomike që gabon me një sekondë në 80 milion vjet. Zoti Ji thotë se ora e re është me shumë se dy herë e saktë sepse ajo punon me rrahje më të shpejta. "Parimi i përgjithshëm është se kur prodhon një orë, duhet që lëkundja bazë të jetë sa më e shpejtë që të jetë e mundur, gjë që të krijon mundësinë për të gjetur shumë më shpejt gabimet."

Sa e shpejtë është një dridhje? Një orë e vjetër bën tik-tak një herë në sekondë. Orët më ekzakte që janë sot në përdorim numërojnë rrahjen natyrale brenda një atomi që vjen nga luhatjet e energjisë me miliarda herë në sekondë. Fizikani Andru Ludlou, i cili është duke punuar me Xhun Ji, thotë se ora e re e ekipit të tij gjithashtu varet nga një atom. "Atomi, që zëvendëson pendulin e një ore të vjetër, lëviz para-mbrapa dhe duke numëruar lëvizjet ashtu siç ndodhin, në atë mënyrë kontrollon dhe kohën. Në të njejtën mënyrë, atomi ka një frekuencë lëkundjeje natyrale. Ne po mundohemi të numërojmë këto dridhje, për të parë se si po përparon atomi dhe që në fund të fundit është orë."

Zoti Ludlou thotë se ajo që ndryshon në orën e re është se si ajo numëron lëkundjet. Një nga orët më ekzakte në ditët e sotme është ora standarte amerikane në Insitutin Kombëtar të Standarteve dhe Teknologjisë në Boulder. Ajo punon nëpërmjet shpërthimeve radioaktive të mikrovalëve për të bërë numërimin.

Por, ndërsa këto mikrovalë lëvizin me një shpejtësi të jashtëzakonëshme, ato humbasin shumë rrahje. Zoti Ludlou thotë se ora e re eksperimentale përdor diçka që lëviz edhe më shpejt dhe që kap më shumë rrahje: rrezen lazer.

Për të përdorur këtë orë me precizion super të lartë duhen një numër i jashtëzakonshëm pajisjesh. Në laborator janë katër tavolina, secila në madhësinë e një kamioni të vogël, të mbuluara me tela, pompa vakumi, lazër, pasqyra, kuti metalike dhe xhama zmadhues. Andru Ludlou thotë se kjo është diçka e pritshme. "Nuk do ta vëmë që nesër në dorë, natyrisht."

Por, komjuterat e parë në botë zinin një dhomë të tërë dhe sot disa pajisje komjuterike mund të vihen në kyçin e dorës. Kështu, zoti Ludlou thotë se orët më të sakta do të përmirësojnë sistemin e komunikimit pa kabllo dhe sitemet satelitore në anijet kozmike që do të shërbejë për zbulimin e botëve të tjera.

Protesta në ceremoninë e ndezjes së pishtarit olimpik

2008-03-26T03:37:56Z

VOA - Protesta në ceremoninë e ndezjes së pishtarit olimpik

Aktivistë për të drejtat e njeriut shkaktuan ndërprerje në ceremoninë e ndezjes së pishtarit olimpik për Lojrat e Pekinit që u zhvillua sot nën masa të rrepta sigurie në qytetin antik grek Olimpia.

Tre anëtarë të organizatës Gazetarët Pa Kufi, me seli në Paris, shpalosën një flamur ku pesë rrathëve olimpikë u ishte dhënë forma e prangave, në shenjë proteste ndaj shkeljes së të drejtave të njeriut që ata thonë se ka kryer Kina.

Thirrjet e tyre për bojkotimin e Lojrave të Pekinit ndërprenë fjalimin e shefit të Komitetit Olimpik Kinez, Liu Qi. Protestuesit u arrestuan menjëherë dhe u larguan nga stadiumi. Pak çaste më vonë disa protestues pro-tibetianë u përpoqën të ndalnin përcjelljen e pishtarit përmes rrugëve të Olimpias.

Një grua tibetiane e lyer me bojë të kuqe u shtri në rrugë para këmbëve të atletit që mbante pishtarin. Të paktën 9 protestues u ndaluan nga autoritetet.

Putin udhëzon qeverinë të dërgojë ndihma për të gjithë banorët e Kosovës

2008-03-25T11:23:56Z

VOA - Putin udhëzon qeverinë të dërgojë ndihma për të gjithë banorët e Kosovës

Presidenti rus Vladimir Putin ka udhëzuar qeverinë të përgatitet për të dërguar ndihma humanitare për serbët dhe shqiptarët e Kosovës. Presidenti Putin foli sot në një mbledhje të kabinetit, ku tha se kishte udhëzuar kryeministrin Viktor Zubkov të hartonte një plan shpërndarjeje për të ndihmuar të gjithë banorët e Kosovës.

Urdhëresa presidenciale pason kërkesën e qeverisë serbe për ndihma mjekësore dhe ushqimore për pakicën serbe të Kosovës. Ministri i Jashtëm rus Sergei Lavrov tha se gjendja humanitare në zonat serbe është rënduar gjatë javëve të fundit.

Shtetet e Bashkuara dhe pjesa më e madhe e vendeve evropiane e kanë njohur pavarësinë e Kosovës nga Serbia. Megjithatë, Rusia, një aleate tradicionale e Serbisë dhe anëtare me të drejtë vetoje në Këshillin e Sigurimit, mbështet pretendimet serbe mbi Kosovën.

Në zhvillime të tjera, qeveria serbe paraqiti sot një propozim zyrtar që Kosova të ndahet në vija etnike. Një dokument i bërë publik, thekson se Beogradi njeh juridiksionin e OKB-së në Kosovë, por shton se vetëm serbët mund të kontrollojnë policinë, gjyqësorin dhe pikat e kalimit të kufirit në rajonet e mbizotëruara nga serbët në Kosovën veriore.

Inxhinjeri kinez dënohet për spiunazh

2008-03-25T10:20:01Z

BBC - Inxhinjeri kinez dënohet për spiunazh

nga Sarah Morris

Një inxhinjer amerikan i lindur në Kinë, është dënuar me 24 vjet burg pasi u gjet fajtor se ishte përpjekur t'i jepte Kinës sekrete të mbrojtjes amerikane.

Inxhinjeri, Chi Mak punonte për një kompani amerikane që kishte kontrata me marinën në Kaliforni.

Ai u dënua majin e kaluar, i akuzuar se kishte bërë përpjekje për t'i dhënë Kinës informacione sekrete lidhur me nëndetëse të pazhurmshme.

Në këtë komplot përfshihen vëllai i tij, bashkëshortja, kunata dhe një nip.

Gjykatësi amerikan i Distriktit që i dha atij dënimin dhe e gjobiti me 50 mijë dollarë tha se kohëzgjatja e dënimit kishte si qëllim t'i jepte Kinës një mesazh të fortë për të mos dërguar agjentët e saj që të vjedhin sekrete ushtarake amerikane.

Chi Mak, që është 65 vjeç u gjet fajtor se përpiqej të dërgonte materiale të rëndësishme dhe ishte duke punuar si agjent pa vënë në dijeni qeverinë amerikane.

Ai u arrestua në tetor të vitit 2005 pasi agjentët i gjetën një disk që përmbante informacione të koduara lidhur me nëndetëset amerikane.

Ky disk ishte i fshehur në një metodë të mësimit të anglishtes me CD dhe ishte futur në bagazhin e të afërmve të zotit Chi Mak që po përpiqeshin të hypnin në një avion të linjës Los Anxhelos- Hong Kong.

Një mijë ushtarë amerikanë bëhen gati të shkojnë në Kosovë

2008-03-24T08:22:19Z

VOA - Një mijë ushtarë amerikanë bëhen gati të shkojnë në Kosovë

Një mijë ushtarë amerikanë nga Garda Kombëtare në shtetin e Mizurit janë duke u përgatitur për të marrë pjesë në operacionet paqeruajtëse në Kosovë. Ushtarët e Mizurit do të disklokohen jo më vonë se muaji qershor, pasi të përfundojnë trajnimin luftarak.

Është planifikuar që trupat të shërbejnë deri në marsin e vitit të ardhshëm. Ato do t'i bashkohen forcës paqeruajtëse të NATO-s që tashmë është vendosur në rajon.

Gjeneral-Brigade Leri Kej, është cituar nga një gazetë kryesore në Misuri, Sent Luis Post-Dispeç, të ketë thënë se ushtarët ndoshta do të vendosen në pjesën e tensionuar në veri të Kosovës.

Kosova, e populluar 90 % nga shiptare muajin e kaluar deklaroi pavarësinë e saj nga Serbis. Që nga shpallja e pavarësisë së Kosovës, minoritetit serb është përfshirë në protesta të dhunëshme, veçanërisht në veri të Kosovës.

Shtetet e Bashkuara ishin nga vendet e para që njohën pavarësinë e Kosovës, që deri më sot është njohur nga më shumë se 30 shtete. Beogradi ka reaguar duke tërhequar amabsadorët nga vendet që mbështesin Kosovën.

Javën e kaluar, Presidenti Bush autorizoi furnizimin me armë të Kosovës, që sipas tij do t'i shërbejë forcimit të sigurisë dhe paqes në rajon.

Gati kënga shqiptare për Eurovizion

2008-03-23T00:19:00Z

Gati kënga shqiptare për Eurovizion

Më 20 maj nis në Beograd Festivali Evropian i 53-ti ku marrin pjesë 43 vende. Shqipëria do te konkuroje me këngën fituese në Festivalin e Këngës në Radio Televizionr "Zemrën e lamë peng", e kënduar nga Olta Boka, me muzikë të Adrian Hilës dhe poezi të Pandi Laços. Kënga shqiptare do te paraqitet natën e dytë, më 22 maj, e gjashta. Është përfaqësimi ynë i pestë në Eurosong, por për here të parë kënga nuk do të këndohet në anglisht për shkak se e perkthyer nuk shkonte me muziken, kështu është ruajtur varianti ne shqip. Keshtu çdo gje është gati,o rkestracioni i bërë në Itali dhe videoklipi po ashtu edhe instrumentistet, por eshte pasiguria se si do te pritet kenga ne Serbi dhe nese do te votohet. Por e rëndësishme ështe që te paraqitemi denjësisht.

Kërkohet dialog i Kinës me Dalai Lama- n

2008-03-21T10:23:38Z

BBC - Kërkohet dialog i Kinës me Dalai Lama- n

Kryetarja e Dhomës së Përfaqësuesve në Shtetet e Bashkuara, Nancy Pelosi, ka filluar bisedimet me udhëheqësin e mërguar tibetian, Dalai Lama, në Daramsala në Indinë veriore.

Zonja Pelosi është politikania e rangut më të lartë që takohet me udhëheqësin shpirtëror tibetian që prej shpërthimit të protestave kundër Kinës, nga fillimi i muajit.

Deklarata

Nancy Pelosi tha se Shtetet e Bashkuara ishin pranë popullit tibetian në atë që e përshkroi si "kohë të vështirë".

Politikania e lartë amerikane u bërri thirrje njerëzve liridashës në mbarë botën që ta ngrenë zërin.

Takimi ishte planifikuar disa javë para demonstrave në Tibet kundër regjimit kinez, por një zëdhënës i qeverisë tibetiane në mërgim, thotë se takimi është një mesazh se Kina duhet t'i trajtojë më mirë tibetianët.

Para takimit, Sekretarja Amerikane e Shtetit, Condoleezza Rice, u bëri thirrje udhëheqësve kinezë të rifillojnë dialogun me Dalai Lama-n.

Njoftime për gjendjen

Georg Blume, një nga gazetarët e paktë i pranishëm gjatë ngjarjeve të ditëve të fundit në kryeqytetin e Tibetit, Lhasa, para se të dëbohej nga policia, i tregoi BBC-së për gjendjen.

"Mendoj se do të jetë shumë e vështirë të ndalohet marrja në zotërim të plotë e Tibetit nga policia ushtarake dhe gjeneralët e lidhur me të. Në Partinë Komuniste ka disa forca reformiste që do të dëshironin ta ndryshonin politikën në Tibet, por tani atyre iu është vështirësuar shumë ky rol", i BBC-së gazetari Georg Blume.

Si reagim ndaj protestave në Tibet, më herët, autoritetet kineze i shtrënguan masat e sigurisë.

Një korrepondent i BBC-së ka parë postblloqe anekënd qytetit Hezuo, kryeqyteti i krahinës Gansu në kufi me Tibetin.

Prishtina përshëndet zotimet për mbështetje ushtarake amerikane

2008-03-21T09:19:32Z

VOA - Prishtina përshëndet zotimet për mbështetje ushtarake amerikane

Udhëheqësit politikë në Kosovë e vlerësuan lartë vendimin e presidentit amerikan George Bush për të autorizuar furnizimin e Kosovës me armë, ndërsa udhëheqësit serbë e pritën me zemërim një vendim të tillë.

Presidenti i vendit Fatmir Sejdiu duke e përshëndetur veprimin e presidentit Bush, u zotua se Kosova do të jetë një partnere e rëndësishme në bashkëpunimin me Shtetet e Bashkuara. "SHBA-të janë në mbështetje të gjithmonshme si edhe vendet e tjera të BE-së dhe të botës demokratike në ndihmë Kosovës. Ne jemi në një stazë të gjatë të bashkëpunimit dhe nuk mund të them se tash ne kemi kryer një proces të ndërtimit apo të shpalljes së Kosovës si shtet sovran dhe i pavarur dhe t'i ndërkrejmë bashkëpunimet. Ne do të bashkëpunojmë në të gjitha fushat e mundshme për të pas një Kosovë moderne, në atë rrugë të përsosjes sikur vendet e tjera dhe një Kosovë që do të jetë partnere e rëndësishme në të gjitha bashkëpunimet", tha presidenti Sejdiu.

Kryeministri i vendit Hashim Thaçi i vlerësoi si të posaçme marrëdhëniet ndërmjet Kosovës dhe Shteteve të Bashkuara. "Raportet e Prishtinës me Uashingtonin janë specifike, speciale, të shkëlqyeshme dhe natyrisht se prania e KFOR-it amerikan dhe e të gjitha trupave të NATO-s është e mirëseardhur, e respektuar dhe më e përkrahur nga qytetarët në botë", tha Thaçi.

Plani i krye negociatorit të Kombeve të Bashkuara Martti Ahtisaari parasheh që Kosova të ketë Forcën e saj të sigurisë me 2500 pjesëtarë aktivë dhe 800 rezervë, të armatosur lehtë. Udhëheqësit politikë të serbëve të cilët kundërshtojnë pavarësinë e Kosovës reaguan me zemërim ndaj vendimit të presidentit Bush, i cili sipas analistëve në Kosovë do të ndihmojë edhe në përshpejtimin e njohjes së mëtejme të shtetit të ri të Kosovës.

Tri vende fqinjë të Serbisë, Hungaria, Kroacia e Bullgaria njohën Kosovë në 24 orët e fundit duke e çuar në 33 numrin e shteteve që e kanë njohur pavarësinë e saj në mesin të cilave janë Shtetet e Bashkuara dhe vendet më të rëndësishme të Bashkimit Evropian.

Autoritetet në Prishtinë shfaqën sot bindjen se edhe Maqedonia do ta njohë shumë shpejt pavarësinë e Kosovës. Pas takimeve me udhëheqësit e partive politike shqiptare nga radhët e opozitës në Maqedoni, kryeministri Thaçi shprehu bindjen se siç tha njohja e pavarësisë së Kosovë nga ana e Shkupit zyrtar është çështje e kryer. "Maqedonia e ka njohur pavarësinë e Kosovës, pavarësi kjo e cila është shpallë në përputhshmëri me dokumentin gjithëpërfshirës të presidentit Ahtisaari, i cili dokument është përkrahur nga ana e Shkupit", tha kryeministri Thaçi.

Propozimi i zotit Ahtisaari parasheh që vija kufitare ndërmjet Kosovës dhe Maqedonisë të vendoset nga një komision i përbashkët dhe ky propozim është pranuar nga të dyja vendet. Por, "mollë sherri" është bërë debati nëse kjo do të ndodhë para apo pas njohjes së pavarësisë së Kosovës nga Maqedonia.

Telefonat e ri te Skype, si te flasesh pa paguar para

2008-03-20T20:24:56Z

Telefonat e ri te Skype, si te flasesh pa paguar para.

Kompania e madhe europiane Skype ka prodhuar telefonin wifi qe perdor marresin_dhenesin G me anen e te cilit ju mund te flisni pa ndermjetesine e kopjuterit me te gjthe telefonat e botes me nje cmim te ulet ose mund te flisni pa pagese me te gjithe ata (qe tani arrijne ne dhjetra milione njerez) qe perdorin Skype. Telefoni i ri wifi Skype lidhet ne internet ne database-in e Skype kudo qe ka vale te wifi network dhe kryesisht keto jane tani net e gjitha aeroportet ne kafete e njohura Starbucks, Panera Bread ne fastfood-et McDonalds, ne librarite "Book a million", "Barnes and Noble" dhe support clouds dhe T-mobile HotSpots. Sinjal ka edhe ne nje pjese te madhe te hoteleve si dhe ne te gjitha aeroportet e botes. Software I prodhuar nga skype mund te instalohet edhe ne nokia N800 dhe N810duke e kthyer ate edhe ne nje telefon Skype wifi.Po keshtu aim und te instalohet edhe ne PSP 2000. Me prodhimin e ri "3Skypephone" Skype prodhoi telefonin wifi # Giga me 2Megapixel kamera, mp3 player per degjimin e muzikes, si dhe mobil Tv e Internet.

http://www.skype.com/allfeatures/

http://www.skype.com/allfeatures/3skypephone/