Notë proteste serbe kundër Shqipërisë

BBC - Notë proteste serbe kundër Shqipërisë

Serbia i ka dërguar një notë proteste Shqipërisë ku njohja e pavarësisë se Kosovës është cilësuar në kundërshtim me rezolutën, 1244 të Kombeve të Bashkuara.

Nota e protestës i është dorëzuar zv/ministres së Jashtme shqiptare, Edit Harxhi, nga i Ngarkuari me Punë i Ambasadës së Serbisë në Tiranë, Miroljub Zariç.

Sipas deklaratës vendimi shqiptar cënon të drejtën ndërkombëtare dhe do të sjellë destabilizim të rajonit dhe më gjerë.

Diplomati serb, i cituar nga media shqiptare, tha se masat e Serbisë ndaj Shqipërisë do të jenë diplomatike, por nuk mendohet ndonjë embargo.

I ngakuari me punë i ambasadës serbe në Tiranë ka thënë se pas qëndrimit të Shqipërisë ndaj Kosovës, ai nuk mund të presë marrëdhënie të mira me vendin ku ndodhet i akredituar.

Zoti Zariç bëri të ditur se e kanë thirrur në Beograd për konsultime të mëtejshme.

Pas kësaj note proteste pala shqiptare ende nuk ka reaguar.