VOA - DiKarlo: Pavarësia e Kosovës faktor stabiliteti,
përparimi në rajon
Shtetet e Bashkuara njohën dje zyrtarisht Kosovën si shtet
sovran dhe të pavarur. Në deklaratën e njohjes, Shtetet e Bashkuara
zotohen të vazhdojnë të jenë miku dhe partneri i saj i ngushtë. Zëvendësndihmës
Sekretarja e Shtetit për Evropën dhe Euroazinë Rozmari DiKarlo foli me kolegen
Isabela Çoçoli për këtë partneritet dhe për të ardhmen e Kosovës dhe Serbisë si
elemente me rëndësi në Ballkan dhe më tej.
Zëri i Amerikës: Zonja Sekretare, pas njohjen së
Kosovës si shtet sovran dhe i pavarur, çfarë duhet të presë ajo nga Shtetet e
Bashkuara ?
Rozmeri DiKarlo: Mendoj se pozita jonë është shumë e
qartë. Para së gjithash ne kemi qënë një mbështetës i fuqishëm i të
gjitha vendeve në rajonin e Ballkanit. Ne kemi qënë një kontribues i madh
në Kosovë që nga viti 1999 me trupa në KFOR, ne i kemi dhënë ndihmë qeverisë
provizore të Kosovës, ne do të vazhdojmë angazhimin tonë të fortë në rajon me
Kosovën, me Serbinë, me vende të tjera në Ballkan për t'i ndihmuar këto vende
të ecin me shpejtësi në rrugën e integrimit në Evropë dhe në familjen
euroatlantike.
Zëri i Amerikës: Në deklaratën e njohjes thuhet
se Shtetet e Bashkuara do të vazhdojnë të jenë mik dhe partner i ngushtë i
Kosovës. Për çfarë partneriteti është fjala dhe çfarë miqësie do të
ndërtohet me kalimin e viteve?
Rozmeri DiKarlo: Siç e thashë edhe më parë, ne kemi
qënë aktivisht të angazhuar në Kosovë, ne kemi një mision në terren, ne kemi
mbështetur disa programe në fusha të ndryshme dhe do të vazhojmë ta ndihmojmë
Kosovën në zhvillimin e saj ekonomik dhe demokratik. Ne jemi shumë të
kënaqur të shikojmë se në deklaratën e shpalljes së pavarësisë, Kosova
angazhohet të vërë në jetë planin Ahtisari dhe ta përqendrojë vemendjen në
mbrojtjen e minoriteteve dhe gjithë komuniteteve në Kosovë. Ne mendojmë
se ky është një tregues shumë i rëndësishëm. Ne patjetër që do të vazhdojmë të
mbështesim udhëheqësit e Kosovës për vënin në zbatim të këtij
plani.
Zëri i Amerikës: Zonja Sekretare, për sa i përket ndihmës
ekonomike a do të ketë për Kosovën një strukturë të ngjashme me Planin Marshall
për rimëkëmbjen e Gjermanisë, apo me ndihmën ekonomike që i është dhënë
Izraelit?
Rozmeri DiKarlo: Besoj se sot në Bruksel, komisioneri
Oli Rehn njoftoi se do të mbahet një konferencë e vendeve donatore në
javët apo muajt e ardhëshëm për Kosovën. Ne do të marrim pjesë në atë
konferencë, ne do të kontribojmë, ne duam të kontribojmë në ato programe
që kemi mbështetur dhe në programe të tjera për Kosovën, ne do të
vazhdojmë praninë tonë në KFOR, ne do të jemi gjithashtu të pranishëm në Zyrën
Civile Ndërkombëtare që parashikohet në planin Ahtisari. Kështu Shtetet e
Bashkuara do të vazhdojnë të jenë një kontribues i fuqishën në zhvillimet e
Kosovës.
Zëri i Amerikës: Në deklaratën e njohjes së Kosovës si
shtet sovran dhe i pavarur, u bëhet thirrje udhëheqësve serbë të punojnë
sëbashku me Shtetet e Bashkuara dhe partnerët e tyre për të realizuar qëllimet
e përbashkëta për mbrojtjen e të drejtave, segurisë, kulturës dhe jetesës së
komunitetit serb në Kosovë. A ka ndonjë shenjë që tregon se udhëheqja
serbe ka prirje për të shkuar në këtë drejtim?
Rozmeri DiKarlo: Historikisht, Serbia dhe Shtetet e
Bashkuara kanë qënë miq. Ne kemi qënë aleatë në dy luftra botërore,
ne punojmë sëbashku në shumë aktivitete, ne kemi një komunitet të madh serb në
Shtetet e Bashkuara dhe ne do të bëjmë çdo përpjekje për t'i vazhduar dhe
forcuar këto lidhje.
Zëri i Amerikës: Ju personalisht keni qënë shumë e
angazhuar në rajon, veçanërisht gjatë dy viteve të fundit, në mos gaboj.
Çfarë mendoni për zhvillimet e këtyre dy ditëve të fundit?
Rozmeri DiKarlo: Për mua tani është koha për t'i lënë
pas konfliktet e viteve 90-të. Shpresoj që të gjitha vendet e
rajonit të përqafojnë të ardhmen që i pret, si anëtarë të Bashkimit Evropian
eventualisht, si anëtarë të NATO-s. Ky është qëllimi dhe objektivi ynë
final për rajonin dhe mendoj se me zgjidhjen e kësaj çështjeje të madhe që
kishte mbetur, e gjithë rajoni do t'i drejtojë sytë nga e ardhmja. Do të
doja të theksoja se Beogradi dhe Prishtina negociuan për më shumë se dy vjet.
Ne dëshironim që palët të arrinin në marrëveshje, po kjo nuk u bë e
mundurl. Ne e kishim bërë të qartë qendrimin tonë që në fillim se në
mungesë të një marrëveshjeje Plani Ahtisari rruga më mirë përpara për të nxitur
paqen dhe stabilitetin në rajon. Tani qe një numër vendesh kanë vendosur ta
njohin Kosovën ose kanë shprehur synimin për ta njohur atë, ne shpresojmë se që
të gjithë mund të ecin përpara, veçanërisht Serbia dhe Kosova.
